भूकमरी

मोह धरावा कशाचा
क्षणभंगूर जीवन सारे
दु:ख चिरंतन सोबती
सुख नसे घडीचेही कारे

झोंबती नरडीस जळवा
वदता निषेधाचे नारे
मागता घास आपुलाच
चढती धुरीनांचे पारे

नसे आभाळात ओलावा
गळती अपशकुनी तारे
भिजली चूल पेटविता
विझवती वादळी वारे

तनु तुरुंगात मरणाच्या
गिधाडांचे बसले पहारे
पसरता पदर जीवासाठी
बंद माणुसकीची दारे

मृत्युशय्येवर शांत माता
कंठ चिमण्याचा सोकला रे
आटले सागर विशाल ते
चाखतो अश्रूजल खारे

चिताही नाही नशिबी
साचले कलेवरांचे ढिगारे
सापळ्यावर सारली रेती
भूकमरे झाले किड्यांचे चारे
@ शंकर पाटील - २०/११/२०११