पदर

उन्हातान्हात राबताना
थोडी सावली देतो हा पदर
घामानं माखल्या चेहऱ्याला
हळुवारपणे पुसतो हा पदर

हमसून रडणाऱ्या लेकराला
मायेच्या सावलीत घेतो पदर
थंडीनं बाळ कुडकुडताना
कधी तो बनतो गरम चादर

गरिबीच्या लक्तरातून कधी
उघडे पडते पदरावीन उदर
लाचारी ना दिसे कुणाला
विस्फारते विषयासक्त नजर

भिकेसाठी कधी विवश
पसरतो कुणापुढेही हा पदर
घरंदाज नारीचा संस्कार
कुळाची अब्रू झाकतो पदर
@ शंकर पाटील - २३/१२/२०११